ԶԱՔԱՐ ԽԱՉԱՏՐՅԱՆ-100. Ինձ թվում էր` բոլոր նկարիչներին Զախար են ասում…

Տեղադրված է at Մայիս 3, 2024
638 0

Այս օրերին շատ են խոսվում հայտնի սիսիանցիների մասին: Համարյա բոլորին էլ ճանաչում եմ, բոլորից էլ փորձել եմ մի բան սովորել: Այ, Քալանթար պապից սովորել եմ առույգ ու կայտառ մնալու, լավատեսության նուրբ արվեստը, իսկ բժշկուհի Օլյայից` սիրված ու հարգված լինելու գաղտնիքը, թեպետ նրա հետ առանձնապես շփում չեմ էլ ունեցել, բայց միշտ զգացել եմ նրա կշիռը Սիսիանում:

Իսկ Զախար Խաչատրյանից սովորել եմ, թե ինչպես պետք է իրեն պահի սիսիանցին: Այնպես, ինչպես իր պահվածքն էր, իր կեցվածքը:

Լուս ու մութ տարիներին, իմ ուսանողության ժամանակ, հաճախ էի տեսնում նրան, դասավանդում էր Երեւանի մանկավարժական ինստիտուտի գեղարվեստի ֆակուլտետում: Հասնում էր մասնաշենք, ուղղում կոստյումը, ձեռքով շտկում մազերը, բարևում բոլորին ու էլ չէր երևում: Իսկ ես հիշում էի, որ նրա մասին մեր տանը շատ էին խոսում: Որովհետև իմ քույրիկ Լիլիթը շատ լավ նկարում էր, իսկ իմ քեռի Վիգենն ասում էր մորս.

-Լարիս, էրեխու նկարները բեր տանենք Զախարը նայի:

Ու, չգիտես ինչու, ինձ թվում էր` բոլոր նկարիչներին Զախար են ասում:

Հետո տեսա նրան` ճերմակ մազերով նկարչին, ում Աստված ճերմակ գույնով էր ստեղծել, ու հասկացա, որ նա հենց նկարիչ Զախարն է, ով իր գույնը բերեց գեղարվեստի աշխարհ:

Սիսանցիները նրա կնոջը անունով չէին դիմում, ասում էին Զախարի կին, իր տղա Ավագին` Զախարի տղա:

-Այ մարդ, ես դրա նման կով կթող չեմ տեսել. մատներն էնպես արագ է շարժում,– Ավագի մասին ասում էր նրանց հարևան Քալանթարի տղա իմ քեռի Վիգենը:

Իսկ Եփրեմվերդին առաջին անգամ Զախարի կնոջ ձեռքին եմ տեսել. նա ծանոթներին գուշակություններ էր անում եւ դրանով, կարծես, ուզում էր լրացնել ոչնչով աչքի չընկնող Սիսիանի իննսունականների բացը:

Հիմա այնքան ուրախ եմ, որ նրանց` ուրիշ ճարտարապետությամբ աչքի ընկնող տունը թանգարան է դարձել ու դուռը բացող կա, որ մեծարանք կա այս ընտանիքի հանդեպ:

Խոնարհումս բոլոր նրանց, ովքեր սկսել են գնահատել միշտ ստվերում իրենց պահած, բայց Սիսիանն իրենց անունով ճանաչեցրած անզարդ սիսիանցիներին:

Լուսինե ՎԱՐԴԱՆՅԱՆ

28 մարտ, 2020 թիվ

 

 

Ձեզ կարող է հետաքրքրել նաև

Հայրենական պատերազմի միակ վետերանը

Տեղադրվել է - Մայիս 9, 2022 0
Լորեցի 98-ամյա Հակոբ Լեւոնի Վարդանյանը Սիսիանի տարածաշրջանի` Հայրենական պատերազմի միակ վետերանն է: Հայրենական պատերազմի հաղթանակի 77-ամյակի կապակցությամբ նրան շնորհավորել, բարեմաղթանքներ…

ԱՌԱՆՑ ՔԵԶ Եւ ՔԵԶ ՀԵՏ…

Տեղադրվել է - Դեկտեմբեր 29, 2021 0
Քսան տարի առաջ այս օրը ուրիշ տրամադրություն էր Նիկալյանների հարկի տակ… 20 տարի առաջ այս օրը շնորհավորանքներ էին, մի բարձի…

Հայացք` դրսից. Հայը իմ ճանաչած ամենահյուրընկալ եւ առատաձեռն ժողովուրդն է

Տեղադրվել է - Հուլիս 10, 2023 0
Անգեղակոթում դեռ հիշում են տարիներ առաջ գյուղի միջնակարգ դպրոցում աշակերտներին անգլերեն սովորեցրած, գյուղացիներին շատ հարցերում օգտակար եղած «Խաղաղության կորպուսի» կամավոր,…

Leave a comment

Ձեր էլ. Փոստի հասցեն չի հրապարակվի:

*

code